Dinamita namatyan sa diver?

CEBU, Philippines - Gimandoan sa direktor sa Cebu Provincial Police Office ang kapolisan sa lungsod sa Daanbantayan nga mohimo og dugang imbestigasyon sa kamatayon sa usa ka diving instructor.

Kini nunot sa taho nga nabuthan sa dinamita ang biktima samtang nag-dive sa kadagatan sa barangay Paypay.

Si CPPO Director Noel Gillamac ang nimando na sa Provincial Investigation Detective and Management Branch sa pagsusi sa impormasyon.

Niadto’ng Septiyembre 30, usa ka Al Bernard Coyoca, 33, ang nakit-ang nadagsa sa baybayon nga wala na’y kinabuhi pasado alas 5 sa sayo sa buntag.

Sa pagpakighinabi sa Banat News sa imbestigador sa Daanbantayan Police Station, Police Officer 3 Victor Avenido, kini nitug-an nga nakadawat na sab sila sa kamandoan gikan sa CPPO.

Gipasabot ni Avenido nga bisan pa man og wala pa sila nakadawat og mando, naghimo na sila og pagpalawom sa imbestigasyon pagsubay sa tinuoray nga hinungdan sa kamatayon ni Coyoca.

Tulo ka anggulo ang gitan-aw sama sa problema sa gamit sa pang-dive sa biktima, pisikal niini nga kondisyon ug ang dinamita nga gilabay sa wala pa mailhi nga tawo.

Si Avenido niingon nga ang dinamita nga anggulo ang labi’ng duol nga ila’ng gisubay ug may nakuha na sila nga testigos sa hitabo.

Gipaabot usab ang resulta sa autopsy sa patay’ng lawas sa biktima.

Matud ni Avenido nga aduna na sila’y gisundan nga personalidad nga posible’ng nihimo sa hitabo apan dili pa kini nila matug-an kay nagpadayon pa ang imbestigasyon.(BANAT NEWS)