Dalaga gi-gang rape

CEBU, Philippines - Nagpakitabang sa kapulisan sa Fuente Police Station ang usa ka 21 anyos nga babaye ug mipasangil nga gitabangan kini og lugos sa tulo ka mga lalaki ug duha niini mga varsity players sa basketball team sa usa ka pribadong unibersidad dinhi sa dakbayan sa Sugbo.

Ang 21 anyos nagpuyo sa usa sa mga barangay sa dakbayan sa Sugbo samtang ang mga suspetsado nag-abang sa Urgello Street, barangay Sambag 2 ning dakbayan.

Matud pa ni Chief Inspector David Señor, officer in-charge sa Fuente Police nga nahinabi sa mga tigbalita, ang biktima mipasangil nga nahitabo ang pagpanglugos niadtong Oktubre 4 sa gabii.

Sumala pa nga ang biktima kuyog sa iyang mga barkada ug ig-agaw nag-inom sa usa ka bar sa Mango Square.Gikatahong nananghid ang dalaga nga mangasilyas apan wala na kini nabalik.

Ang biktima mipasangil nga paingon na unta kining mogawas sa banyo dihang gihawiran siya sa tulo ka mga lalaki ug sa dihang nilugnot siya gisumbag siya sa usa maong nakuyapan.

Nakamata ang 21 anyos didto na kini sa boarding house sa mga suspetsado diin kini mipasangil nga gipulipulihan og lugos, ug pagkahuman gidala siya sa karsada ug gibiyaan.

Ang biktima daling midangop sa kapulisan  ug sa gihimong follow-up operation gidakop ang caretaker sa boarding house nga usa sa gitudlo sa biktima nga milugos kaniya.

Padayon pang gipangita sa kapulisan ang varsity player  ug ang laing kauban niini.

Apan ang suspetsado nga nahinabi sa mga tigbalita kini hugtanon nga mihimakak sa pasangil sa babaye. Sumala pa niya dunay mipukaw kaniya bahin sa usa ka babayeng nagsige og singgit diha sa gawas.

Adunay nagtug-an kaniya nga ang maong babaye gidala sa varsity player sa boarding house apan  wala na kini  sa iyang lawak.

Nahibulong na lang ang caretaker nga gidala siya sa mga polis aron imbestigaron kay gitudlo kini sa 21 anyos nga usa sa mga milugos kaniya.

Matud pa niya, dihang naa na siya sa presinto mitawag sa telepono ang varsity player ug miangkon sa nabuhat ngadto sa maong babaye, apan siya ra ang nihimo sa krimen.

 “Wala gyud ko kahilabot, wala gyud ko ana sir, wala ko nakaila anang bayhana. Nianhi man gani ‘tong ig-agaw niya diri nangayo og sorry kay sila man kauban nag-inom,” saysay pa niini. (BANAT NEWS)