Comelec magpabutang og dugang polis

CEBU, Philippines – Ang Comelec sa probinsiya mohangyo sa kapolisan sa probinsya pagbutang og mga polis diha sa tanang buhatan sa Comelec sa lalawigan nunot sa nagsingabot nga pagduso sa certificate of candidacy (COC) sa mga mokandidato sa eleksiyon sa sunod tuig.

Karong Oktubre 12 hangtud 16, 2015 gikatakda ang pagduso sa COC sa mga kandidato hangtud sa Oktubre 31, 2015.

Si Lionel Marco Castillano, Provincial Comelec officer, mibutyag kagahapon nga gikatakda na siyang mopadala og suwat ngadto sa hepe sa kapolisan sa probinsiya kabahin sa mao niyang hangyo.

Gipasabot ni Castillano nga bisan ang Comelec walay nakitang problema apan kinahanglan nga mangandam sila. Si Comelec chairman, Andres Bautista mihatag kini og kamanduan sa tanang election officers nga makig-coordinate sa mga hepe sa kapolisan sa ilang lugar alang sa security atol sa kataposang adlaw sa pagpangrehistro.

Gilikayan ni Castillano nga adunay mahitabong gubot tali sa mga supporters sa mga kandidato nga posibleng magdungan og duso sa ilang COCs.

Ang mga mokandidato sa kalungsuran gipanawagan ni Castillano nga kun magpahigayon sila og caravan kinahanglan makig-coordinate sila  sa kapolisan sa ilang lugar alang usab sa ilang seguridad ug sa pagmando sa trapiko. – /EIM) (BANAT NEWS)