Hepe sa Naga hulipan human sa piyesta

CEBU, Philippines – Kutob na lang sa kapiyestahan sa siyudad sa Naga si Police Superintendent Ricky Delilis ug siya relibuhan na ni Superintendent Jovito Canlapan.

Kini human nipagawas og kamanduan ang pangulo sa kapolisan sa probinsya sa Sugbo, Senior Supt. Noel Gillamac. Si Mayor Valdemar Chiong nagkanayon nga nibisita niya si Gillamac sa niagi’ng semana ug nipahibawo nga hulipan niya si Delilis tungod kay wala siya malipay sa gipakita’ng labok niini diha sa iya’ng lugar human sa usa ka buwan ug pipila ka adlaw isip officer-in-charge sa kapolisan sa siyudad. Matud ni Chiong nga wala siya’y nakita’ng problema ni Delilis apan kung mao kini ang gusto sa iya’ng labaw wala na siya’y mahimo.

Si Chiong nipadayag nga gusto siya og permanente nga hepe aron dili dali’ng mapapahawa ug makapakita gyud og sakto’ng labok sa iya’ng trabaho. "I am the kind of person nga kung maayo ka wala ka’y sayop aw magpabilin ka pero lisud pud nga moapil pa ko sa isyu bahin sa ila’ng organisasyon," matud ni Chiong.

Asoy ni Chiong nga nipadala na siya og suwat hangyo nga tagaan og permanente’ng hepe sa kapolisan aron makatutok sa ilegal nga kalihukan sa siyudad. Si Delilis hulipan na unta niadto’ng petsa 1 sa Oktubre apan gilugwayan hangtud petsa 12 human sa piyesta sa siyudad.

Sa iya’ng bahin, si Delilis nagkanayon nga daghan pa unta siya og mga plano sa siyudad sama sa paghimo og dagku’ng operasyun sa ilegal nga drugas, pag-umol sa force multiplier ug uban pa.

Si Delilis kinsa ibutang sa ila’ng buhatan sa probinsiya niingon nga wala siya’y mahimo kun dili sa pagtuman og unsa’y gusto’ng mahitabo sa iya’ng labaw. Si Delilis ang nakauna og lingkod sa bag-ong opisina nga proyekto sa kagamhanan sa siyudad.

Nakahimo og duha ka buy-bust operation si Delilis sulod sa iya’ng pagkahimo’ng labaw sa kapolisan sa Naga. – /GMR) (BANAT NEWS)