“Kawatan” gipatay

CEBU, Philippines – Patay ang usa ka lalaki human kini pusila sa wala mailhing kriminal samtang kini naglakaw diha sa Sitio Eagles, barangay T. Padilla ning dakbayan sa Sugbo pasado ala una sa nakalabay nga kaadlawon.

Ang biktima mao si Ernesto Aracan, 28, dunay kapuyo nga taga sitio Freedom sa maong barangay.

Matud pa ni Police Officer 2 Memecio Dinopol sa Homicide Section sa Cebu City Police Office nga nahinabi sa Banat News  nga ang ka live-in partner sa biktima mitug-an nga kawatan ang namatay.

Sumala pa ni Dinopol nga makadaghan na kining gibadlong sa kapuyo apan wa gyud mopatuo.

Niadtong nakalabay nga kaadlawon usa ka sipang buto sa armas ang nadungog gikan sa gawas sa ilang gipuy-an ug sa pagsusi sa kapuyo nagkadugo na ang biktima ug dunay samad pinusilan sa likod nga milapos sa dughan.

Gidala sa usa ka pribadong tambalanan ang biktima apan nakabsan kini sa iyang kinabuhi.

Hangtod karon nagpadayon pa ang gihimo nga imbestigasyon sa kapulisan aron sa pagpangita og testigo aron pagtumbok sa mamumuno sa  biktima. – /EIM) (BANAT NEWS)