Ginukoray sa ‘pushers’ ug polis tulo sikop

CEBU, Philippines – Tulo ka mga lalaking misuway og ikyas gikan sa mga otoridad sa managlahing mga lugar nadakpan ug nakuhaan og dul-an P200 mil nga shabu.

Sa barangay Lanipga, lungsod sa Consolacion nadakpan si Dante Herrera Ordenes, taga Mabini, Cebu City kinsa nakuhaan og kapin 13 gramos nga gidudahang shabu nga nagkantidad og P159 mil.

Matud pa ni Police Officer 1 Socrates Borinaga sa Consolacion Police Station nagpatrolya sila si Inspector Fermin Doque sa bukirang bahin sa barangay Lanipga dihang ilang nalabyan ang usa ka payag dunay naghantak maong ilang giduol apan nag-iyahay sila og panagan.

Usa sa midagan si Ordenes kinsa padung mosakay sa gi-parking nga multicab mao ilaha kining gibabagan.

Bisan giunsa pagmando sa pag-abli sa sakyanan wala kini mopatuo hangtud naabtan na lang og pipila ka gutlo hinungdan nga napugos ang mga polis paglungkab sa pultahan ug gidakop si Ordenes.

Sa pagrekisa kaniya usa ka dakong pakete sa gidudahang shabu ang ilang nasakmit ug usa ka kalibre .38 nga puno sa mga bala niini.

Sa laing hitabo sa ginukoray, nadakpan sa kapolisan sa Alcoy ang duha ka mga lalaking sakay sa usa ka motorsiklo nga nakuhaan og pinaketeng shabu diha sa barangay Pasol.

Ang mga nadakpan mao sila si Raniel Ragas, 30, ug ang iyang backrider nga si Quirino Bustamante, 23, pulos nagpuyo sa lungsod sa Dalaguete.

Matud pa ni Police Officer 3 Rosendo Binondo, imbestigador sa Alcoy Police nga nahinabi sa Banat News nakadawat sila og impormasyon gikan sa ilang confidential informant nga adunay drugas nga ipalusot sa magsakay og motorsiklo gikan sa Dalaguete paingon sa Alcoy.

Tungod niini giatangan sa mga polis ang maong motorsiklo diha sa utlanan sa lungsod sa Dalaguete. Ang mga suspek nasigpatan dayon luwan sa motorsiklo nga wala’y plaka apan mipasutoy sila pagpadagan sa motorsiklo hinungdan sa nahitabong ginukoray gikan sa barangay Pugalo hangtod sa barangay Pasol.

Dihang naapsan, nisuway pa paglayat ug mikaratil og dagan si Bustamante apan nakuptan dayon kini sa mga polis.

Nakuha sa kapulisan gikan ni Ragas ang usa ka dakung putos sa gituohang shabu samtang nakuha sab gikan ni Bustamante ang siyam ka gagmay nga pakete sa drugas diin ang tanan mokantidad ug kapin 20 mil pesos.

Ang mga suspek mibutyag sa mga polis nga gisuholan lang sila og tag 150 pesos matag usa ug gipa-full tank ang gasoline sa ilang motorsiklo  bugti sa paghatod sa drugas paingon sa Alcoy. – /EIM) (BANAT NEWS)