Notadong tulisan napatay

CEBU, Philippines – Gitumbok nga notadong tulisan napusilan-patay human giingong misukol sa mga sakop sa City Intelligence Branch sa Cebu City Police Office (CCPO) kagahapon sa buntag didto sa Blessed Sacrament, Villagonzalo II sa barangay Tejero, dakbayan sa Sugbo.

Ang napusilan giila nga si Jerben “Pislat” Rodriguez, 34 anyos, walay trabaho, dunay live-in partner ug nagpuyo sa maong dapit.

Matud ni Senior Police Officer 2 Ruth Violango sa Homicide Section, si Rodriguez adunay kasong robbery ug base usab sa gipamahayag sa igsuon niini may kaso usab kini nga illegal possession of illegal drugs.

“Naay nanawag nila(CIB) nga concerned citizen nga naay armed person, ilang giadto didto pero giingnan na sila daan nga mao ni siya ang kusog manulis diha sa maong lugaraha, pag-adto nila pagpaila nila nga pulis giderestso sila og pusil mao to ilaha sad si pusil(Rodriguez),” sigon pa ni SPO2 Violango.

Dihang nangabot ang mga polis, naabtan nila si Rodriguez nga nag-ayo sa iyang motorsiklo apan sa ilang pagduol ug pagpaila nga sila mga polis, gikatahong miibot kini dayon og armas.

“Ang kauban nako maoy nakabantay nakasinggit nako “bantay sir”, mao ‘to giunhan na lang namo kay sa kami hinuon ang madisgrasya,” matud pa ni Insp. Gomersendo Mandawe, deputy chief sa CIB nga nahinabi sa Banat News.

Si Mandawe miingon nga notado na nga tulisan sa maong dapit ang suspetsado, nalambigit sab kini sa ilegal nga drugas ug daghan na sab kini og reklamo silang nadawat nga nalambigit kini sa pagpamusil.

“Nangalipay ang mga tawo sa area kay nakuha na gyud daw si Pislat, ingon pa sila nga naa pa daw daghan. Ang ato lang unta nga dili na lang sila manukol kay natural modepensa pud mi sa among kaugalingon, kay kung polis mapusilan ingnon dayon nga polis pulpol,” pasabot pa ni Mandawe.

Hinungdan napugos ang kapulisan sa pagbawos pagpusil kaniya ug nakaangkon kini og daghang samad pinusilan sa nagkadaiyang bahin sa iyang lawas.

Si Rodriguez gitabang pa sa mga sakop sa Cebu City Emergency Medical Services(CCEMS) apan nakabsan na kini sa kinabuhi.

Nakuha sa kapulisan diha sa crime scene ang usa ka.45 kalibre pistol  nga adunay pito ka bala, duha ka kabhang sa .45 kalibre nga bala, drug paraphernalia, tulo pakete sa gituohang shabu ug kwarta nga nagkantidad og P1,500. – /EIM) (BANAT NEWS)