Duha naghikog sa Mandaue

CEBU, Philippines – Namatay gyud sa tambalanan ang usa ka tinun-an sa kolehiyo nga naghikog sulod sa lawak sa ila’ng panimalay sa Tabok, dakbayan sa Mandaue alas 8 pasado sa buntag kagahapon nga ang hinungdan mao ang pagkunhod sa iya’ng grado. Ang mga polis nga nitubag sa alarma  nakakaplag sa crime scene ug usa ka kalibre .45 nga armas ug usa ka kabhang dapit sa nagkadugo nga lawas sa namatay.

Sa imbestigasyon nga gihimo sa kapolisan nasuta nga nahimo’ng suliran sa tinun-an ang pagkunhod sa iya’ng grado sa tunghaan nga mao’y ilang gituohan nga hinungdan sa paghikog.

Gidala pa sa mga sakop sa pamilya ang tinun-an sa Mandaue City Hospital apan gideklarar nga patay na sa paglabay sa pipila ka oras nga pag-atiman.

Gisusi karon sa kapolisan kung kinsa ang tag-iya sa armas nga gigamit sa tinun-an sa paghikog lakip na sa ilang gisusi kung legal ba ang paghupot niini.

Sa nakalabay nga gabii sa sitio Hermag, Basak, sa mao’ng dakbayan, patay usab ang 26-anyos nga babaye nga giingong naghikog pinaagi sa paghigot og pisi sa liog.

Ang kapolisan niingon nga ang hinungdan sa paghikog mao usab ang kalit nga pagbiya sa hinigugma. – /GMR) (BANAT NEWS)