Ubang tag-iya og PUJ ug taxi nangilad

CEBU, Philippines – Gisugyot ni Land Transportation Office (LTO)-7 Regional Director Arnel Tancinco nga susihon g’yud unta kun tinuod ba nga adunay garahe sa mga sakyanan kadtong mo-apply og prangkisa gikan sa Land Transportation Franchising and Regulatory Board.

Matud ni Tancinco nga nakapadugang sa problema sa kahuot sa mga sakyanan kining mga tag-iya og taxi ug passenger jeepney nga anha ra moparada sa ilang mga sakyanan daplin sa karsada.

Si Tancinco miingon nga nakabantay siya nga ang LTFRB moisyu ra dayon og prangkisa ngadto sa mga applicants bisan og wala nila masiguro kun tinuod ba ang pangangkon nga aduna sila’y garahe sa ilang sakyanan.

Gani, uyon usab si Tancinco sa gisugyot karon nga balaudnon nga giduso ni Valenzuela City Rep. Sherwin Gatchalian nga estriktohon pag-apil ang mga mopalit og private vehicles nga dili sila baligyaan kun dili mag-andam daan og ilang grahe.

Giangkon ni Tancinco nga daghan kaayo nga mga sakyanan, apil na ang mga taxi ug PUJ’s, mga trak de karga, nga anaa ra sa karsada giparada panahon sa gabii ngadto na sa buntag.

Kini tungod kay ang mga tag-iya sa maong sakyanan walay kaugalingong garahe sa ilang units.

Matud ni Tancinco nga ang ubang tag-iya og mga taxi ug PUJ igo ra nga mopresentar sa sketch ug hulagway sa daan nila nga garahe sa ilang units, apan ang bag-o nila nga pinalit dili na masulod.

Ang kadagkoan sa LTFRB igo lang moingon nga imbestigahon nila ang mga operators nga ireklamo sa publiko, apan magkinahanglan sila og pormal nga reklamo.

Matud ni Tancinco nga ang LTO andam moabag sa kampanya batok sa mga badlongong operators apan kinahanglan nga ang Local Government Units (LGU) maoy mangulo sa paghimo’g kampanya. (BANAT NEWS)