Trak natagak sa kimba

CEBU, Philippines – Upat ka tawo ang naangol human nga nahagbong sa kimba ang delivery truck nga ilang gisakyan diha sa Upper Media Once sa barangay Media Once sa dakbayan sa Toledo kagahapon.

Ang mga naangol mao sila si Gilbert Esquila Malinaw, 35, taga Bacolod City, drayber sa maong trak ug ang iyang mga helpers nga sila si Raymond Almoger Canete, 19, taga Cadiz City, Jhonwel Caballo Domen , 23, ug Alexander Caballo Halaron, 29, nga pulos taga La Libertad, Negros Occidental.

Matud pa ni Senior Police Officer 1 Edmund Liston sa Don Andres Soriano (DAS) Community Precinct  sa pakighinabi sa Banat News, gikan sa lungsod sa Minglanilla ang maong delivery truck ug paingon sa Negros.

Aduna kini karga nga kinahong mga softdrinks apan samtang nagsubay sa dalan, gikatahong kalit nga nawad-an og kontrol sa manobela si Esquila.

Tungod niini, nalahos sa kimba nga may gilawmong 10 ngadto sa 15 ka metros ang ilang gisakyan kuyog silang tanan.

Ang mga residente sa lugar daling mitawag sa kapolisan ug gitabangan sa pagkuha ang mga biktima ug gidala sa Toledo City Hospital.

Padayon pa karon ang kapolisan sa pag-imbestigar kun unsay hinungdan sa maong aksidente. – /EIM) (BANAT NEWS)