Ordinasyon ni Bishop Florencio gihangop

CEBU, Philippines - Mga 500 ka obispo ug ubang kaparian ingon man ang liboan ka layko gikan sa nagkadaiyang bahin sa Pilipinas ug sa gawas sa nasud ang nitambong sa episcopal ordination alang ni Fr. Oscar Jaime Florencio sulod sa Palo Metropolitan Cathedral kagahapon.

Ang santos nga misa gipangulohan nila ni Archbishop John Du nga maoy principal consecrator, Most Rev. Guiseppe Pinto, ang apostolic nuncio to the Philippines ug Archbishop Jose Palma sa Archdiocese of Cebu isip maoy mga co-consecrators.

Lakip sa nitambong sa episcopal ordination ni Florencio, mao sila CBCP President Archbishop Socrates Villegas ug mga opisyal sa Palo, Leyte nga gipangulohan ni Mayor Remedios Matin Petilla.

Sa pagsugod sa santos nga misa, gilamasan kini og mga fireworks display nga nakapadugang sa iyang kamabulokon.

Si Florencio adunay Titular Bishop of Listrona uban sa iyang motto "Fiat Misericordia Tua" o let your mercy be upon us o lord."

Gibana-bana mga 200 ka choir gikan sa nagkadaiya nga parokya sa Palo ang nikanta atol sa santos nga misa.

Matud ni Archbishop Palma, bisan og gikuso-kuso ang Palo ug pipila ka bahin sa Leyte sa mangtas kaayo nga bagyo’ng Yolanda apan bulahan gihapon ang katawhan sa maong dapit kay nagpakita kini nga anaa ang gugma ug grasya sa ginoo kanila.

Emotional usab ang inahan ni Bishop Florencio nga si Florenda sa dihang nahinabi sa Banat News.

Matud niya nga sa mga bata pa ang iyang mga anak kanunay niya kini nga gipahinumdoman sa paghigugma sa Ginoo ug sa katawhan ug  naglaom siya nga buligan pa ang iyang anak sa bag-ong tahas niini nga gihuptan. (Rowena D. Capistrano/RUB)(BANAT NEWS)