Kaslonon naghikog patay
CEBU, Philippines - Patay ang usa ka habal-habal driver nga naghikog pinaagi sa pagdunggab sa iya’ng dughan nga taga barangay Libaong, San Remigio alas 7 pasado sa buntag niadto’ng Huwebes.
Si Senior Police Officer 2 Joe Johnnesky Inot sa San Remigio Police Station niila sa naghikog nga si John Millor, 23-anyos, kinsa gikatakda’ng kaslon sa kapuyo karong Septiyembre 18.
Matud ni Inot nga sa pakisusi nga ila’ng gihimo ila’ng nasuta nga sayo sa buntag nga namasahero sa iya’ng habal-habal.
Diha’ng nipauli, sa ila’ng panimalay mao’y gisugat sa kapuyo ang reklamo tungod sa wala pagpundo daan og tubig.
Wala motingug ang lalaki nga nisaka sa taas sa ila’ng panimalay apan pipila ka gutlo ang nakalabay namatikdan na lang nga nagsusapinday na nga nanaug nga nagkadugo ang dughan.
Dali nga nangayo’g panabang ang kapuyo ug gidala sa Bogo Provincial Hospital apan gideklarar nga dead on arrival.
Si Inot niingon nga sa wala pa nahitabo ang paghikog, ang namatay daan na nga nipadayag sa suliran nga giatubang nga naglakip na sa gastohan sa umaabot niya’ng kasal ug ang binuwan nga datahan sa motorsiklo nga gihimo niya’ng habal-habal. (Romeo T. Limpangog/GMR)(BANAT NEWS)
- Latest
