Gi-salvage, gitambog sa kimba

CEBU, Philippines - Gibalian sa liog ug gituohang gi-salvage ang usa ka lalaki nga gilabay ug nakit-an kagahapon sa buntag didto sa Sitio Maling, Barangay Babag, bukirang bahin sa dakbayan sa Sugbo.

Ang biktima giila nga mao si Emard Coliflores, hingkud na ug minyo nga taga Barangay Cabadiangan, Compostela. Si SPO2 Rommel Bancog sa homicide section sa Cebu City Police Office (CCPO) miingon nga ang uyoan ug asawa sa biktima maoy miila sa patay’ng lawas.

Wala pa masayri ngano nga ang patay’ng lawas ni Coliflores didto man napalgan sa bukid. Gusto sa uyoan ug sa asawa sa biktima nga sekreto nga makigsulti sa mga polis.

Nagtuo si SPO2 Bancog nga aduna’y nahibaw-an ang uyoan kun ngano nga gipatay ang iyang pag-umangkon, kang kansang lawas gilabay sa usa ka kimba sa Barangay Babag.

Sigun sa pakisusi nga gibalian sa liog ang biktima kay nagtuay-tuay na ang iyang ulo ug wala kini mga samad sa kalawasan apan ang ulo giputos og selopin nga gituyo aron dili kini makaginhawa.

Ang mga polis nagtuo nga dili kay usa ra ka tawo ang nagpatay ni Coliflores kay himsog man og panglawas ang biktima. Gisuta pa sa kapolisan kun aduna ba’y nakakita sa paglabay sa maong patay nga lawas didto sa mao nga lugar nga gituohan nga gihimo kagahapon sa kaadlawon. (Jojo C. Ugdol/RUB)(BANAT NEWS)