3 ka tawo gipangpusil

CEBU, Philippines - Tulo ka tawo, apil ang giingong alalay sa usa ka druglord, gipangpatay sa managlahi nga dapit dinhi sa dakbayan sa Sugbo ug didto sa dakbayan sa Toledo.

Ang gipatay mao sila si Edward Flores, 28, taga Barangay Punta Princesa; Aljilito Zamoras, taga Sitio Mahayahay, Calamba, dakbayan sa Sugbo ug ang ikatulo giila pa lang sa angga nga Juvy, nga didto gipatay sa barangay Matab-ang, Toledo.

Wala pa mailhi kun kinsa ang mipatay ni Juvy nga gipusil kagahapon sa kaadlawon didto sa Maraat Daku sa Barangay Matab-ang. Si Juvy matud pa taga Buanoy, Balamban.

Matud sa kapolisan nga adunay nagtuo nga si Juvy alalay sa usa ka druglord sa Toledo. Nakaangkon si Juvy og pinusilan sa likud sa iyang ulo ug sa bukton.

Samtang si Flores, nga giila nga tigas sa Punta Princesa, nagkuyog ug ang iyang higala nga menor de-edad aron pagpalit unta og sigarilyo didto sa Sitio Tuburan, Barangay Punta Princesa apan sila gipangpusil.

Si PO3 Lou Pagara, imbestigador sa homicide section sa Cebu City Police Office (CCPO), miingon nga si Flores naila gayud nga maldito sa ilang lugar ug suspek ‘sab sa pagpanunggab niadtong nakalabay nga bulan.

Nagduda si Pagara nga gibaslan ang biktima ug naangin lang ang iyang kauban. May pinusilan kini sa tiyan ug abaga. Gituohan pa nga gibunal-bunalan si Flores sa mamumuno kay nakaangkon man og bali ang iyang bukton.

“Maldito g’yud kuno ni sa ilang dapit kay bisan pa og tan-awon lang nimo masuko dayon. Grabe’ng sukoa g’yud sa mihimo ani,” matud pa ni PO3 Pagara.

Nagtuo sab si Pagara nga lagmit nakaila ang menor de-edad sa nagpusil kanila kay bisan may pinusilan siya sa likud wala kini nagpa-admit sa Cebu City Medical Center.

Bisan og daghang balay ang anaa sa palibot sa nahitaboan apan walay mitug-an kun kinsa ang namusil sa mga biktima.

Sa laing pagpamusil sa Barangay Calamba, ang 21-anyos nga Zamoras gipusil sa tawo nga nagsakay og motorsiklo didto sa Sitio Almacin.

Nahibaw-an nga ang grupo ni Zamoras adunay gikulata nianang gabii sa wala pa siya gipusil. Ang nag-angkas sa motorsiklo maoy mipusil kang Zamoras sa likud. (BANAT NEWS)