Mga kapitan mibiya sa BOPK

CEBU, Philippines – Pito ka kapitan sa barangay sa bukid sa dakbayan sa Sugbo mipahibalo nga mibiya sila sa Bando Osmeña Pundok Kauswagan(BOPK) ug nakig-alyado na sila sa Team Rama.

Si Tinago Barangay Captain Joel Garganera, vice chairman sa Association of Barangay Council (ABC), nangangkon nga sa 80 ka barangay sa dakbayan mga 60 na ka kapitan ang alyado sa Team Rama.

Ang mga kapitan nga mibiya sa BOPK mao sila si Nerissa Antolihao (Budlaan), Zenaida Colina (Bacayan), Maria Velasquez (Pulangbato), Felix Limotan (Sirao), Orlan Herrerra (Guba), Manny Pepito (Mabini) ug Casimero Pilones (Paril).

Si Colina miingon nga silang pito ka kapitan midayeg sa serbisyo ni Mayor Michael Rama tungod kay wala sila nakita nga pagdumot sa politika.

Apan si kanhi  kongresista Tomas R. Osmeña nga maoy pangulo sa BOPK miingon nga dugay na kaayo nga ang pito ka kapitan mitapon sa pundok ni Rama.

Matud ni Osmeña nga nagtuo siya nga napugos ra g’yud ang mao nga mga kapitan nga makig-alyado kang Rama kay mahadlok nga dili sila mahatagan og bag-ong service nga sakyanan.

Nagtuo si Osmeña nga gipagawas sa Team Rama ang report sa pagtapon sa pito ka barangay kapitan bisan og kini dugay na aron pag-alkontra sa isyu nga pagbiya ni Konsehal Mary Ann delos Santos sa Team Rama ug anaa na karon sa BOPK. – /RUB) (BANAT NEWS)