Snatcher nanglabni kay way kaon

CEBU, Philippines – Usa ka 20-anyos nga suspetsadong snatcher mitug-an nga napugos siya sa pagpanglabni og selpon aron iya kini nga ikabaligya kay wala na siya’y kaon sulod sa duha ka adlaw.

Apan gidemalas si John Rey Maghanoy, taga Campo 3, dakbayan sa Talisay kay nadakpan siya sa mga polis ug anaa karon siya gitanggong sa Police Station 2 sa Cebu City Police Office (CCPO).

Si PO2 Alexander Terado, desk officer sa Station 2, miingon nga si Maghanoy nadakpan sa mga tanod sa Barangay Kamputhaw human kini nakabiktima og duha ka babaye nga nakuhaan niya og mahalon nga selpon ug kwentas.

Si Maghanoy adunay kauban nga giila lang nga si Jonnel apan nakasibat ug wala madakpi.

Matud ni Maghanoy nga wala gayud siya magplano nga manglabni og selpon apan napugos lang aron may ikapalit og makaon kay wala na siya makakaon sulod sa duha ka adlaw.

Nakuhaan si Maghanoy ang usa ka ice pick. Matud ni Maghanoy nga misuway siya pagpangayo’g pagkaon sa usa ka kan-anan apan wala siya hatagi. – /RUB) (BANAT NEWS)