“Tulisan” nga mag-wig nadakpan
CEBU, Philippines – Usa ka gidudahang holdupper sa mga PUJ nga magsuot og wig nadakpan sa mga sakop sa Waterfront Police Station didto sa Villagonzalo II, Barangay Tejero ning dakbayan sa Sugbo kagahapon sa buntag.
Ang dinakpan naila nga si Yoland Antone, 35, alyas Yong-yong nga nagpuyo sa maong dapit.
Matud ni Chief Insp. Jose Gesto, officer in-charge sa Waterfront Police Station, nga ila gayud nga gipangita ang maong suspetsado human sila nakadawat og daghang reklamo sa mga pasahero sa jeep nga kanunay sila mabiktima sa tulis.
Ang mga biktima mitug-an nga taas og buhok ang tulisan. Sa abag sa mga tanod sa Tejero, nahibaw-an nila nga si Antone ang posible nga tulisan ug nasakmitan pa kini og wig.
Nakuhaan og 38 kalibre nga revolver nga may tulo ka bala si Antone atol sa iyang pagkasikop. May mga biktima na sa tulis nga miila sa dinakpan nga maoy mitulis kanila. – /RUB) (BANAT NEWS)
- Latest
