Gitagoan sa nagpatay ni Alegre gipangita

CEBU, Philippines - Gitutukan karon sa kapolisan ang pag-ila sa mga nipatay kang Atty. Amelie Alegre ug pagpangita sa gitagoan human gipagawas ngadto sa publiko ang naumol nga facial composite.

Ang direktor sa Mandaue City Police Office, Senior Supt. Mariano Natuel Jr., niingon nga sunod-sunod ang ila gihimo nga case conference tali sa Criminal Investigation and Detection Group-7.

Matud ni Natuel nga duna na sila’y kalambuan apan dili una nila ikabutyag.

Laing yunit ang gitahasan sa pag-imbestigar kang Atty. Briccio Boholst kinsa kauban ni Alegre ug naangol sa pagpamanhig.

Samtang ang MCPO wala pa’y nadawat nga komunikasyon gikan sa National Bureau of Investigation nga nakakuha og diary nga posible’ng makatabang sa imbestigasyon.

Giklaro ni Natuel dili nila dali-dalion ang kaso ni Alegre. (Decemay P. Padilla/GMR)

Sunog sa Sindulan tinuyo?

Gisusi sa fire marshall sa dakbayan sa Sugbo, Chief Inspector Rogelio Bongabong, ang taho nga gituyo ang sunog sa sitio Sindulan, barangay Mabolo.

Matud ni Bongabong nga iya’ng ipatawag ang mga tawo nga nalambigit aron kuhaan og pamahayag.

Pinaagi niini ila’ng masuta ang buhaton batok sa mga tawo nga nakaingon sa sunog sa lugar.

Apan si Kapitan Reynaldo Ompoc sa iya’ng bahin nibutyag sa Banat News nga magtigum pa sila sa konseho aron matuki kung pila ang ihatag nga financial assistance sa mga pamilya nga apektado sa sunog.

Dili nila ipaubos sa state of calamity ang lugar tungod kay gamay ra ang apektado.

Samtang si Ompoc andam moatubang kung ikiha sa nangangkon sa luna tungod sa iya’ng pagdumili paghatag og tanod diha’ng koralon unta ang nasunugan.

Matud ni Ompoc nga klaruhon una nila kung unsa’y plano sa lugar.

Atol sa pagbunok sa kusog nga uwan niadto’ng Huwebes, 13 ka pamilya ang apektado sa sunog. (Rowena D. Capistrano/GMR)(BANAT NEWS)