Kooperasyon publiko gihangop

CEBU, Philippines - Ang chief of staff sa Police Regional Office (PRO)-7 ug head sa secretariat committee sa APEC, Senior Superintendent Rey Lyndon Lawas nagpasalamat sa publiko tungod sa ilang kooperasyon.

Ug tungod niini wala maproblema ang traffic management sa dakbayan sa Lapu-Lapu, Mandaue ug dakbayan sa Sugbo diin ang mga delegado dili malangan sa ilang biyahe.

Sa laing bahin, ang mga delegado sa APEC mapasalamaton kaayo sa organizaing committee tungod sa serbisyo ug pag-atiman ngadto kanila ilabi na sa pagsuroy-suroy nila sa mga lugar nganhi sa Sugbo.

Si Rowena Montecillo, regional director sa Department of Tourism mibutyag nga sukad sa pagsugod sa APEC niadtong Agosto 22 nakadawat sila og mga pasalamat gikan sa mga delegado.

Ang mga delegado natagbaw kini sa mga girekomendar nga tours sa APEC organizing committee.  Sa laing bahin, gisaway sa pipila ka buok nga mga militanteng pundok nga nagmartsa diha sa Fuente Osmeña Rotunda sa Cebu City ang pagpahigayon sa gobiyerno sa APEC meet tungod kay sud sa 26 ka tuig na nga pagkasakop sa Pilipinas niini, wala kini makahatag og kalamboan.

Gihagit usab nila ang gobiyerno pagsuporta sa industriyalisasyon, suportahan ang  sektor sa agrikultura ug putlon ang kontraktwalisasyon.

Mibahad usab sila nga dili lang sa kalsada sila mowadwad sa ilang protesta, paninguhaon nilang sa venues sa APEC meet aron didto mopadayag sa ilang protesta. (Brenda Batuto ug Decemay Padilla/EIM)(BANAT NEWS)