120 ka magtutudlo gi-drug test

CEBU, Philippines – Mga magtutudlo sa Don Carlos A. Gothong Memorial National High School sa dakbayan sa Sugbo gipaubos sa kinalit nga drug test sa mga sakop sa Cebu City Office on Substance Abuse Prevention (COSAP) kagahapon sa buntag.

Mao na kini ang ikatulo nga pangpublikong eskuylahan sa dakbayan nga gipaubos sa kinalit nga drug test ang mga magtutudlo, isunod usab niini ang mga magtutudlo sa night high school sa mao gihapong tunghaan.

Sumala pa ni Dr. Alice Utlang, pangulo sa COSAP, apil sa gikuha sa drug test ang biometrics sa mga magtutudlo nga maoy rekisitos sa Department of Health.

Kini nagpasabot nga dunay kopya sa resulta sa drug test ang ubang law enforcement agencies sama sa National Bureau of Investigation, Land Transportation Office, Philippine National Police aron maoy mohimo og aksyon batok sa mga magpositibo.

Dugang pa ni Utlang nga mas maayong kadtong mogamit niini moangkon na lang daan aron di sila pasuwaton sa biometrics ug pasuwaton na lang og laing porma nga nagbutyag nga giangkon niini nga siya tiggamitan og drugas ug nagkinahanglan og tabang.

Si Utlang niklaro nga ang katuyoan sa drug test dili aron pasakaan og kaso ang mga tawo nga nalambigit niini, kung dili ang pagtabang kanila nga tungod kay sila biktima.

"But it needs cooperation, kay tiggamitan ka unya dili ka mosulti kay maulaw ka unya magpa- biometrics ka, so the more na hinuon,” matud pa niya.

Ubos sa Republic Act 9165, ang mga magpositibo sa ilegal nga drugas nga na-biometric gikinahanglang boluntaryong magpaubos sa rehabilitasyon, ang COSAP adunay kaugalingong rehabilitation program alang niadtong moangkong adik ug gustong mobiya niini.

Karong adlawa gikatakda nga ipagawas ang resulta sa drug test sa mga magtutudlo.

Ang prinsipal sa maong tunghaan nga si Ma. Elena Labrada nibutyag sa Banat News nga malaumon siya nga walay positibo sa iyahang mga magtutudlo kay wala man siyay gisuspetsahan kanila nga tiggamitan og drugas.

Gihangop niya ang maong proyekto kay dako kaayo kini og tabang kung duna man gani mga magtutudlo nga nalambigit sa ilegal nga kalihukan.

Dugang pa ni Labrada, kung sa higayon nga adunay magpositibo sa iyang mga sakop andam niya silang tabangan kay nagtuo siya nga biktima ra usab sa maong makadaot nga bisyo. – /EIM) (BANAT NEWS)