Quake drill himuon lukop probinsiya
CEBU, Philippines – Mopahigayun og provincewide earthquake drill ang Provincial Disaster Risk Reduction Management Office (PDRRMO) aron masuta ang kaandam sa kalungsuran kung dunay katalagman.
Si Julius Regner, tigpamaba sa PDRRMO, nibutyag nga lakip sa hisgutan sa ipahigayung tigum sa mga bag-ong napili’ng opisyal sa Local Disaster Risk Reduction Management Office (LRRMO) ang kabahin sa kalihukan.
Buot mahibaw-an sa PDRRMO ang kakuwangan sa kalungsuran kabahin sa pagpangandam sa katalagman.
Bag-o lang nipahigayun ang PDRRMO og earthquake drill sa Kapitolyo diin ang ubang kawani giingong dili seryoso.
Ubang kawani giingong kalma lang kaayo ug wala nibuhat sa mga angayang buhaton sama sa pagtabon sa ila’ng kamot sa ulo kung mogawas sa building ug sa pagpungko sa lugar diin sila pwede’ng magpundo kung dunay linog.
Si Regner nipasabot nga atol sa earthquake drill ang ubang kawani wala’y kalibutan sa ila’ng buhaton tungod kay ang PDRRMO nakigtagbo lang kini sa mga department heads.
Dugang ni Regner nga angayang seryosuhon ang earthquake drill aron kung dunay mahitabo nga katalagman malikayan ang disgrasya.
Nasayran nga una’ng nipahigayun ang Metro Manila Development Authority (MMDA) sa earthquake drill nunot sa taho nga posible’ng maigo og kusog nga linog ang Metro Manila. – /GMR) (BANAT NEWS)
- Latest
