Nasunogan nabalakang di na makabalik sa gipuy-an

CEBU, Philippines – Nabalaka karon ang mga nasunogan nga di na unya sila patukoron og balik sa ilang mga panimalay sa luna tungod kay gipanag-iya kini og pribadong pamilya.

Si Catalina Amansi, usa sa mga nasunogan sa pakighinabi sa Banat News nanawagan sa publiko nga hatagan sila og hinabang tungod kay wala g’yud silay nasalbar nga mga butang.

Samtang si Delila Dumdom miasoy tibuok balay niya ang apil nga naugdaw, sinina, pagkaon ug ubang gamit maoy ilang gikinahanglan.

Gikabalak-an nila karon kun makatukod pa ba sila og balik sa ilang mga panimalay.

Hinuon si Kapitan Lemar Alcover miingon nga ilang tukion sa kadagkoan sa Cebu City Hall ang maong problema.

Si Cebu City Mayor Michael Rama mipasalig nga dili angay himuong rason ang katalagman sama sa sunog aron dili na makabalik sa ilang giukopar nga luna ang mga biktima.

Apan sama sa gihapon, kinahanglan una nga ipaubos sa reblocking ang lugar aron dunay kaagian ang mga emergency vehicles kun masubli nga dunay sunog sa lugar.

Ang Quick Response Team ug  ang Department of Social Welfare Services inabagan sa barangay padayon karong niatiman sa mga panginahanglan sa mga biktima.

Kagabii usa ka emergency meeting ang gipahigayon sa barangay ug gilauman nga ideklarar ang barangay ubos sa state of calamity.

Base sa ulahing natala sa talaan sa DSWS,  63 ka panimalay ang hingpit nga naugdaw, upat ang partially damaged , dunay 47 ka pamilyang libreng nipuyo uban sa paryente, 37 ka pamilya ang nag-abang ug lima ang  lodgers.

Sa kinatibuk-an, moabot og 147 ka pamilya o 522 ka mga tawo lakip ang mga bata ug tiguwang ang nasunogan.

Si Rama mimando sa Division for the Welfare of the Urban Poor (DWUP) pagsusi sa mga lugar nga angay i- reblocking samtang gimandoan niini si Konsehal Dave Tumulak, ang pangulo sa Cebu City Disaster Risk Reduction and Management Office pagsiguro sa kahimtang sa mga nasunogan. – /EIM) (BANAT NEWS)