Padung mag-review nadasmagan patay

CEBU, Philippines – Patay na nga nadangat sa tambalanan ang usa ka dalagang bag-ong graduate sa kolehiyo nga padung mag-review alang sa board exams human kini nabanggaan sa usa ka multicab sa National Highway sa Libjo sa lungsod sa Tabogon.

Ang biktima naila nga si Mary Sentillas, 21, nagpuyo sa maong dapit, bag-ong graduate sa kurso nga education nga paingon unta dinhi sa dakbayan sa Sugbo aron mag-review. Samtang ang drayber sa multicab mao si Rodulfo Nuena, 72, taga Don Gregorio Antigua sa lungsod sa Borbon ug usa ka retiradong maestro.

Matud pa ni Police Officer 3 Steeve Booc ang imbestigador sa Tabogon Police nga nahinabi sa Banat News nalandig ‘sab sa tambalanan ang drayber human kini gikulata sa mga tawo sa maong dapit.

Sumala pa ni Booc nga samtang naglakaw sa kilid sa kurbadahon ug dulhogon nga bahin sa kalsada ang biktima tayming naigo kini sa nagdulhog nga multicab paingon sa dakbayan sa Bogo.

Sa pangidaron ni Nuena nagtuo si Booc nga lagmit wala na niini nabantayan ang biktima kilid sa kalsada. Gusto pa unta sa drayber nga isakay sa multicab ang biktima aron madali kini og hatod sa tambalanan apan mipasirit nalang kini og pagpadagan human nakabantay nga naa’y daghang mga tawo ug naa ‘sab ang pamilya sa biktima.

Sigun pa ni Booc nga plano unta sa suspetsado nga motahan sa labing duol nga police station diha sa Bogo apan natanggong kini sa traffic  hinungdan nga naabtan kini sa mga paryente ug sa mga tawo nga migukod kaniya ug gitabangan siya sa pagkulata.

Didto na sa kapitan sa maong barangay mitahan ang suspetsado nga gikuha na sab sa kapulisan sa Tabogon ug gidala sa tambalanan.

Ang dalaga  uwahi nang nadala sa Bogo District Hospital apan nakabsan na kini sa iyang kinabuhi.

Karong adlawa gipaabot sa kapulisan ang pamilya sa namatay nga mobalik sa ilang buhatan aron masayran kung mopadayon ba kini sa pagpasaka og kaso. – /EIM) (BANAT NEWS)