Babaye, bata naghikog

CEBU, Philippines – Usa ka babayeng naguol tungod sa iyang sakit ug usa ka batang naputong ang naghikog sa managlahing dapit dinhi sa Sugbo.

Patay nang nadiskubrehan sa iyang mga kabanay si Ma. Charina Norido, 31, nga dunay dakong samad sa iyang ubol-ubol sud sa ilang lawak sa ilang panimalay sa dalan Manubag, Brgy. Lourdes, sa dakbayan sa Bogo buntag niadtong Sabado.

Si Police Officer 3 Elimar Mendoza, imbestigador sa Bogo City Police Station miingon, base sa ilang nakuhang impormasyon daw nawad-an og kadasig sa iyang kaugalingon ang namatay human kini na-diagnosed nga dunay sakit nga leukemia.

Ang ginang dunay samad dinunggaban sa iyang liog ug gisuwayan pa pagdala sa mga kabanay sa Bogo Provincial Hospital apan gideklarar kini nga dead on arrival.

Sa crime scene napalgan ang kapin 13 pulgadang kutsilyo nga ilang gituohang maoy gigamit niini pag-unay og gulgol sa ginang sa iyang liog.

Samtang usa ka 17- anyos nga dalagita sa Sitio Lower Lamakan, Valladolid sa dakbayan sa Carcar ang napalgang nagbitay sa silong sa ilang balay ug wa nay kinabuhi niadtong Sabado sa buntag.

Ang gituohang naghikog mao si Katrina Lapiña, 17, nagpuyo sa iyang apohan sukad nga duha pa kini ka tuig tungod sa pagbiya sa inahan niini ug pagkapriso sa amahan.

Matud pa ni Police Officer 1 Roy Repolidon ang desk officer sa Carcar City Police nga nakahinabi sa Banat News, naghikog ang maong batan-on human giaway sa iyang ig-agaw ug giingnan nga “bogo.”

Matud pa human sa maong hitabo naghilak kini nga misulod sa iyang lawak ug pipila ka minutos ang milabay nakit-an na lang kini nga nagbitay ilawom sa ilang balay.

Sulay pa unta kini nga gidala sa Carcar District Hospital apan nakabsan gayod sa iyang kinabuhi.

Gitug-an ‘sab ni Repolidon nga makatulo na ka higayon nga nisulay  paghikog ang dalagita pinaagi sa paglaslas sa iyang kamot apan kini natabang, pirme niya kining buhaton kun makasab-an o kun dunay mangaway niini.

Nagtuo si Repolidon nga kuwang sa pagmahal sa iyang tinud-anay nga ginikanan ang bata hinungdan nga ubos kaayo kini og pagsalig sa kaugalingon. – /EIM) (BANAT NEWS)