Estudyante nanulis

CEBU, Philippines - Nasikop sa kapolisan ang duha sa tulo ka lalaki diin  usa niini menor de edad nga ilang nadakpan samtang nag-eskuyla tungod sa pagtulis sa Ngohiong Express ug sa usa sa kustomer niini pasado alas 5 kagahapon sa buntag sa dalan P. del Rosario Extension ug N. Bacalso Avenue ning dakbayan sa Sugbo.

Ang nasikop naila nga si Richard Rama, kinsa nakuhaan og .357 revolver samtang ang usa ka suspek nga menor de edad naabtan sa kapolisan sa lawak saringan niini sa usa ka pangpublikong tunghaan sa maong dapit kagahapon sa buntag.

Si Chief Inspector David Señor, OIC chief sa Fuente Police Station ug hepe sa Theft and Robbery Section, ug Crime Scene Investigation Unit sa Cebu City Police Office, nga nahinabi sa Banat News miingon nga ang duha nadakpan sa follow-up operation sa Fuente Police.

Matud pa ni Señor nga pasado alas-5 kagahapon sa kaadlawon si Rama kuyog ang duha ka menor nangaon sa Ngohiong Express, apan pagkahuman og pangaon kalit gitionan ni Rama og armas ang trabahante samtang ang duha maoy mimaneho og kuha sa kwarta sulod sa kaha ug bag sa usa ka kustomer.

Nakuha sa mga tulisan ang P5 mil nga halin sa Ngohiong Express, ug bag sa kustomer nga may sulod nga cellphone.

Sa follow-up investigation nasuta nga si Rama ang mition sa armas hinungdan nga gipangita dayon siya sa mga polis hinungdan sa iyang pagkasikop ug nabawi ang P1,000 nga kwarta ug ang kalibre .357 revolver lakip na  ang bag sa kustomer.

Ang usa sa mga suspek nga 14-anyos didto na naabtan sa mga polis nga nitambong sa iyang klase kagahapon sa buntag ug giendorsar kini ngadto sa Brgy. Sambag 1.

Gipangita pa karon sa kapolisan ang laing usa ka lalaki nga menor nga kuyog sa duha nga nangasikop. Si Rama natanggong karon sa Fuente Police Station ug pasakaan kini og kasong pagpanulis.          

Sa laing bahin, usa ka head teacher sa International English Language School sa Sitio Binabag, Brgy. Estaca, sa lungsod sa Compostela ang gitulis sa nag-inusarang tulisan niadtong Biyernes sa gabii.

Si Senior Police Officer 2 Pedro Enriquez sa Compostela Police Station miila sa biktima nga mao si Rolando Hopia, 28, taga  Sabang, Dakbayan sa Danao.

Matud pa ni Enriquez kuyog sa biktima ang duha ka magtutudlo nagpaabot og masakyan pauli dihang gihunongan sila og motorsiklo nga giluwanan sa usa ka lalaki ug mideklarar og tulis.

Gikuha sa tulisan ang laptop sa head teacher apan wala hilabti ang mga butang sa duha ka kauban niini. (BANAT NEWS)