Fetus napalgan sa junkshop

CEBU, Philippines - Napalgan ang patay na nga puya nga gisulod sa plastic container diha’ng ilabay na unta sa care taker nga babaye human sa gihimo nga pagpanglimpiyo sa Lucring Junkshop sa sitio Sangi, Hagnaya, San Remigio alas 4 sa hapon sa niagi’ng adlaw.

Si Police Officer 2 Herman Bulawic sa San Remigio Police Station niingon nga ang caretaker sa junkshop nga si Jhellen Muñez Andrin, 24-anyos, taga sitio Cantecson, Gairan, dakbayan sa Bogo, ang nanglimpiyo sa mga sulod sa junkshop.

Mao’y nasigpatan ang plastic box nga gisirado sa pagtabon ang takob niini ug sa iya’ng pag-alsa daw nakamatikod siya nga adunay gibug-aton ug naaghat siya sa pag-abli.

Nasuta ang nagluko nga patay nga bata hinungdan nga dali kini’ng nagpahibawo sa junkshop. Ang tag-iya sa junkshop dali nga nangayo og tabang sa kapolisan ug si Dr. Ortile Ursal ang niila nga anaa sa lima ngadto sa unom ka buwan nga gisabak ang puya. (BANAT NEWS)