Delos Santos nakurat kay apil sa Team Rama line-up

CEBU, Philippines - Konsehal Mary Ann Delos Santos nasurpresa nga giapil pa gihapon siya sa lineup sa Team Rama bisan wala siya pahibaw-a.

Nipadayag si delos Santos nga magpabilin independente bisan pa man apil siya sa gideklarar ni Mayor Michael Rama isip konsehal sa North District sa dakbayan sa Sugbo.

“I am maintaining my independence and am not affiliating with any party,” pasabot pa sa konsehal nga kanhi barangay kapitan sa Lahug sa iyang text message dinhi sa Banat News.

Kagahapon, gibutyag ni Mayor Michael Rama ang pasiunang lineup sa iyang partido alang sa 2016 elections.

Lakip sa gihimo ni Rama mao ang pag-usab sa pangalan sa ilang partido ug gitawag na kini karon og Partido Panaghiusa sa Panirbersyo Tungod sa Gugma sa Team Rama UNA (PPPTG- TRUNA).

“I dont know why I've been considered in the line-up when I was never informed or consulted about such move,” dugang pa ni delos Santos.

Apan kun si Rama maoy pasultihon pabiling sakop sa ilang partido si delos Santos ug wa silay planong ilisan kini.

“Mary Ann is never been out of the group,”matud ni Rama.

Kauban ni delos Santos nga gideklarar ni Rama nga iyang mga mokandidato pagka-konsehal sa North District silang Konsehal Noel Wenceslao, ug Jerry Guardo samtang sa South District mao sila Konsehal James Cuenco, Hanz Abella, Dave Tumulak, Renato Osmeña.

Samtang sa pagka- kongresista sa North District mao si kanhi mayor Alvin Garcia ug sa South District mao si Konsehal Gerry Carillo.

Gitudlong Chairman Emeritus sa PPPTG- TRUNA mao si kanhi kongresista Tony Cuenco ug magpabilin nga campaign manager si kanhi konsehal Atty. Joey Daluz ug Konsehal Ritchie Osmeña.

Si delos Santos gihugon-hugonang motapon na sa karibal nga partido nga Bando Osmeña Pundok Kauswagan (BOPK) human matud pa sa ilang panagtagbo ni Konsehal Margarita Osmeña ug kanhi mayor Tomas Osmeña pipila ka mga adlaw na ang nakalabay.  (BANAT NEWS)