One-way traffic nakapaluag sa kadalanan

CEBU, Philippines - Nakapaluag sa mga sakyanan ang gipatuman nga one-way traffic sa pipila ka kadalanan sa dakbayan sa Mandaue sugod kagahapon.

Naglakip sa mga dalan ang A. del Rosario sa barangay Guizo lahos sa dalan Sotero Cabahug sa Ibabao-Estansia.

Si Glenn Antigua, officer-in-charge sa Traffic Enforcement Agency of Mandaue (TEAM), niingon nga ang mga sakyanan paingon sa Consolacion adto moliko sa dalan Colina sa Ibabao-Estancia ug molahos sa Highway Maguikay.

Matud ni Antigua nga ilang namatikdan nga naghuot ang dagan sa mga sakyanan sa dalan P. Burgos sa Alang-Alang tungod kay ang mga sakyanan subay sa dalan Plaridel adto man mosubay tungod kay nagpadayon pa ang pagtrabaho sa karsada.

Si Antigua niingon nga dali nilang nahatagan og pagtagad ang suliran pinaagi sa pag-awhag sa kontraktor sa proyekto sa pagsusi sa kahimtang sa maong dalan.

Dugang ni Antigua nga ang mga pasahero anha gyud mopahimutang sa pag-atang sa maong lugar sanglit diha moagi ang ilang sakyanan paingon sa Consolacion ug sa dakbayan sa Sugbo. (BANAT NEWS)