Naglumos sa kaugalingon

CEBU, Philippines - Usa ka lalaki ang naghikog pinaagi sa paglumos sa iyang kaugalingon ug nigamit og bato aron mapundo siya sa ilawom sa taga-hawak nga tubig sa dagat sa baybayon sa Sitio Buyo, Brgy. Binongkalan sa lungsod sa Catmon.

Ang gituohang naghikog ug namatay naila nga si Dario Rojo, 43, usa ka kanhi construction worker nga nagpuyo sa maong dapit.

Matud pa ni Police Officer 3 Ben Navales ang imbestigador sa Catmon Police nabantayan kini sa mga kabanay nga daw nagsalimuang kay dunay tawong buot mopatay kaniya.

Sumala pa ni Navales nga 18 ka tuig nagtrabaho sa probinsya sa Surigao si Rojo ug ang mga paryente niini nagtuong nagumon kini paggamit og ilegal nga drugas didto hinungdan nga nalisoan sa pangisip.

Dugang pa ni Navales nga niadtong nanglabay nga mga adlaw nadapatan ni Rojo ang iyang manghod kay matud pa wala na kini nakaila sa manghod.

Sa batoan nga bahin sa baybay sa maong lugar miambak si Rojo ug ang iyang sinina iyang gisudlan og mga bato ug gihikot sa iyang lawas ug nitidlom.

Ang iyang manghod misuway pa unta  pagpakgang niini apan gikulata hinuon kini ug gihulga hinungdan nga mibiya ang manghod ug dihadiha gikatahong milayat sa tubig si Rojo.

Nakita usab nga nag-ugbok pa kining daan og kandila sa bato sa maong dapit diin siya nilayat sa mabaw nga tubig, apan didto sa ilawom, gikatahong migakos og maayo sa mga bato si Rojo hangtud nga kini nalumos.

“Kung imong tan-awon taga hawak ra ang tubig, pero misalom ni siya mihawid sa bato,” matud pa ni Navales.

Samtang sa lungsod sa Balamban si Felix Sucayre, 43, nga taga Santa Cruz sa maong lungsod ang naghikog tungod sa gihambin niini sa mata. Matud pa panagbitay na kini sa iyang lawak gamit ang pisi.

Gikatahong naguol kini tungod kay wala na mabalik iyang panan-aw bisan gioperahan ug gitangtang ang glaucoma sa iyang mata. (BANAT NEWS)