Polis nangilkil og P20

CEBU, Philippines – Nagpakitabang sa Mabolo Police Station ang usa ka dispatser human kini mipasangil sa usa ka polis nga mikulata kaniya kay wala niya mahatagi og P20 diha sa MJ Cuenco Avenue, Brgy. Mabolo ning dakbayan sa Sugbo niadtong Sabado sa sa buntag.

Ang mireklamo mao si Edward Decina, 30,  ug ang iyang gireklamong polis mao si Police Officer 1 Jerome Solano, kanhi nadestino sa Traffic Patrol Group ug wala pa’y semana nga nadestino sa Mabolo Police Station.

Base sa blotter report sa Mabolo Police Station nga gibasa ni SPO4 Reolito Jacalan kini nagkanayon nga Sabado sa alas 10 sa buntag mipasangil ang reklamante nga naabot ang maong polis sa lugar ug nangayo og tag P20 sa matag dispatser apan si Decina mirebenta.

Sa kalagot sa maong polis, giingong gisipa niini ang reklamante ug gisumbag hinungdan nga mireklamo kini sa police station, didto nag-atubang ang duha ug gikatahong nahilot kini dayon.

Apan dihang padung na pauli si Decina, gikatahong gisundan kini sa maong polis ug gibaharan hinungdan nga nibalik kini sa presinto ug gipa-blotter ang paghulga kaniya niini.

“Dili nako gusto makakita sa imong dagway ma’y pa hipuson na lang tika kay basa ka’g baba,” sumala pa sa nabutang sa blotter sa kapulisan nga giingong maoy bahad sa maong polis. Ang hepe sa Mabolo Police Station nga si Senior Inspector Hartzel Peter Bellido nga nahinabi sa Banat News miingon nga wala pa’y semana nga nadestino sa iya gikan sa TPG si Solano.

Gipahibalo ni Bellido nga andam siyang motabang sa dispatser kun gusto niining mopasaka og kaso batok kang Solano.

Ang hepe sa Investigation Detection and Management Branch (IDMB) sa Cebu City Police Office nga si Superintendent Aileen Recla nga nahinabi sa Banat News miingon  posibleng matangtang sa serbisyo kun mapamatud-ang sad-an si Solano.

“Mas maayo ipadayon niya ang criminal case , plus kini’ng admin charges dIri nga i-file. Bug-at kaayo ning alegasyon sa biktima kung tinood ning nangilkil siya unya nangulata pa gyod. Basin gusto niya iyang ibaylo og P20 ang iyang pagka polis,” sigun pa ni Recla.

Ang Banat News sulay pa unta nga mikuha Og pamahayag sa gireklamong polis apan pakyas ang maong tinguha. – /EIM) (BANAT NEWS)