4 milungkab sa videogame sa CPDRC gibartolina
CEBU, Philippines – Gibartolina karon ang upat ka mga priso sa Cebu Provincial Detention and Rehabilitation Center human nila gilungkab ang video game machine nga kalingawan sa mga priso.
Matud pa ni CPDRC Consultant Marko Torral niadtong Biyernes sa gabii nadiskubrehan nga gilungkab ug gipanguha ang mga sensilyo sa maong makina ug sa gihimong imbestigasyon nahibaw-an ang upat ka priso nga maoy nanguha niini.
Ang gipangbartolina mao sila si Dizon Oli, 21, dunay kaso sa paglapas sa Comelec gun ban, Windel Espinosa, 28, dunay kasong robbery, Mico Maru, 23, dunay kasong robbery ug Marvin Blanco,dunay kaso sa ilegal nga drugas.
Sumala pa ni Torral, ang maong mga video machine, ilang gibutang aron adunay kalingawan ang mga priso ug dili mangaburyong apan tungod sa nahitabo ilahang tangtangon ang maong duwaanan.
Si Oli nga nakuhaan og pamahayag sa Banat News miingon nga tiaw-tiaw lang unta ilang plano apan ilaha na lang gipadayon kay hapit na man iyang birthday ug maayo na lang unta to naa siyay mapalit bisan para sabon ug pagkaon tungod kay panagsa lang siyang duawon sa iyang inahan.
Matud niya P80 ra iyang bahin, samtang ang tulo tag P50 ang nadawat.
Apan si Toral nibutyag nga dili mominos sa usa ka libo ang nakuha sa upat.
Si Lito Granada , ang Mayor de Mayores nibutyag nga magpabilin sa bartolina ang upat hangtud nga di nila mabayran ang ilang gipangkawat ug mangayo og pasaylo sa grupo. – /EIM) (BANAT NEWS)
- Latest
