2 pushers, kapuyo nadakpan
CEBU, Philippines – Nadakpan sa kapolisan ang managpuyo kinsa ang lalaki usa ka notado’ng tigpayuhot og ilegal nga drugas sa Imus Extension, barangay Lorega-San Miguel, dakbayan sa Sugbo pasado alas 2 sa nakalabay nga kadlawon atol sa pagpangronda.
Ang dinakpan naila nga sila si Randy Bunal, 37, alyas Ran-Ran ug si Joselou Barba, 19, pareho’ng nagpuyo sa mao’ng dapit.
Bitbit ang search warrant nga giisyu ni Judge Gilbert Moises, sulod sa balay ni Bunal narekober ang 25 ka gagmay nga pakete ug usa ka medium-sized sa gituohang shabu samtang ang kapuyo nakuhaan sab og lima ka gagmay nga pakete sa gituohang shabu ug ang tanan nikantidad og P15,000.
Matud ni Chief Insp. Ryan Devaras, hepe sa Parian Police Station, nga level 2 drug pusher si Bunal kinsa iya’ng mga kostumer mga GRO, call center agents ug mga drayber sa taxi.
Samtang nadakpan sa kapolisan ang pusher sa Poblacion, Tabuelan sa buy-bust operation alas 8 pasado ang takna sa niagi’ng gabii.
Si Police Officer 1 Ricolito Balingcasag sa Tabuelan Police Station niila sa nadakpan nga si Danilo Sumalaga, 35-anyos.
Si Senior Inspector Walter Grapa ang nimando sa buy-bust operation ug sa koordinasyon sa Philippine Drug Enforcement Agency-7.
Nakuha gikan sa dinakpan ang tulo ka gagmay nga pakete’ng shabu nga tag P200 ang usa ug mga shabu paraphernalia nga naglakip sa tinfoil, lighter ug Nokia cellphone.
Ang mga dinakpan pasakaan sa tukmang kaso samtang nagtingkagol sa selda sa kapolisan. – /GMR) (BANAT NEWS)
- Latest
