Penitential Ride mahinayon na g’yud

CEBU, Philippines – Madayon na ang Penitential Ride ugmang adlawa human giaprubahan ni Mayor Michael Rama ang permit sa Sugbo Bikers kagahapon aron mopahigayon sa maong event.

Kini, human makig-meeting si Rama sa mga organizers sa Penitential Ride, Sugbo Bikers, Cebu Journalists Bikers, ug Tindak Sugbo, niadtong Lunes sa gabii.

Kahinumduman nga mideklara ang mayor nga dili ipadayon ang maong event human siya madismaya sa resulta sa night biking nga gipahigayon atol sa Earth Hour niadtong Sabado nga gisalmotan sa 5, 000 ka mga bikers.

Gibutyag ni Rama nga iyang gibakwi ang suspensyon sa maong permit human misaad ang mga organizers nga adunay safety measures nga ilang higpit nga ipatuman.

Lakip niini ang pagsul-ob og safety gears, blinkers, ug adunay marshals, pag-agi sa usa lang ka lane, ug magsunod ‘sab ang mga miyembro sa Quick Response Team.

Si Konsehal Gerardo Carillo, kinsa founder sa Sugbo Bikers, miingon nga lain kining Penitential Ride ug lahi sa night biking niadtong Sabado. Kagahapon, aduna nay 200 ka mga bikers ang mi-confirm nga mosalmot sa maong kalihokan.

Aron malikayan nga dili mag apil-apil ang mga wala maka-register, giawhag ni Carillo ang mga partisipante nga magsul-ob sa ilang uniform nga jersey.

Ang Penitential Ride mahulog og penitensiya sa mga bikers nga mobalhin-balhin sa 14 ka mga simbahan gamit ang ilang mga bikes ug mag-ampo. “Instead of walking, mag-bike mi for Visita Iglesia and mag-pray pud mi sa Rosary while biking from one church to another,” matud ni Carillo.

Dugang niya nga usa kini ka 30-kilometer ride nga magsugod sa Sto. Niño gikan alas 4 sa kaadlawon hangtud alas-8 sa buntag. – /EIM) (BANAT NEWS)