‘Kawatan’ nadunggaban patay

CEBU, Philippines – Patay ang usa ka lalaki nga gidudahang paingon unta mangawat sulod sa usa ka tindahan human kini nasakpan sa tag-iya ug nadunggaban didto sa Sitio Lumbani, Barangay Guadalupe ning dakbayan sa Sugbo.

Ang biktima naila nga si Segfred Pague, 18, usa ka karpentero nga nagpuyo sa maong lugar, samtang ang suspetsado naila nga si Rommel Castro, 44.

Matud pa ni Police Officer 1 Reodul Adalim sa Homicide Section sa Cebu City Police Office nga nahinabi sa Banat News nga niadtong Miyerkules gikawat ang sudlanan sa halin sa tindahan nga puno sa sensilyo.

Tungod niini, diha natulog si Castro sa tindahan aron iyang mabantayan kung kinsa ang kawatan.

Nianang pagka-kaadlawon sa Sabado, nakabantay si Castro nga dunay kanaas gikan sa kisame ug nasuta nga tawo kini ug yano ra kaayong nakasulod sa tindahan.

Dihadiha gisitar kini sa suspek hinungdan sa nahitabong komosyon hangtud nga nakapunit og kutsilyo ang suspek ug nadunggaban ang biktima.

Sigun pa ni Adalim nga suhito kaayo sa tindahan ang biktima kay usa kini sa mga mitrabaho pagpanday sa extension sa maong tindahan.

“Misaka siya sa atop, iyang gi-bukas ang sin unya miagi sa kisame, wa ‘to siya nagtuo nga naa’y tawo sa sulod sa tindahan. Suhito ni siya kung asa lusot kay panday man,” matud pa ni Adalim.

Igo sa nagkalain-laing parte sa lawas ang naangkon sa batan-on nga gitabang pa unta sa mga sakop sa Emergency Rescue Unit Foundation (ERUF) apan patay na kini nga ilang naabtan.

Gitug-an ‘sab ni Adalim nga sa ilang nakuha nga impormasyon duna na ‘sab diay reklamo ang maong biktima sa ilang barangay tungod gihapon sa pagpanghilabot og butang nga dili iyaha.

Kasamtangan nga gitanggong sa presinto sa kapulisan ang tag- iya sa tindahan ug nagpaabot na lang ang kapulisan karong adlawa kung mopadayon ba sa pagpasaka og kaso ang pamilya sa namatay. – /EIM) (BANAT NEWS)