Mag-live in partner nga drug pusher sikop
CEBU, Philippines - Nasikop sa kapulisan sa Toledo ang managkapuyo nga gituohang drug pusher diha sa Macapagal Highway sa Barangay Poblacion dakbayan sa Toledo sa nakalabay’ng adlaw.
Sila si Salvador Jaranilla Diano alyas Buddy, 45, ug Janell Obiedo Baculi, 25, ang nadakpan sa buy-bust operation nga gipangulohan ni Police Inspector Jovito Labra.
Nasayran nga usa ka poseur buyer ang nipalit ngadto kang Diano apan si Baculi ang nidunol sa maong butang. Dihang pagdawat sa duha ka tag P100 nga marked money sa mga suspek dali sila nga gidakop.
Nakuha gikan kang Diano ang duha ka medium size nga pakete sa gituohang shabu nga giluklok sa tuo nga bulsa sa iyang gisul-ob nga shorts.
Samtang si Baculi nasakmitan og siyam ka gagmay nga pakete sa gituohang shabu nga gisulod sa coin purse.
Atol usab sa buy-bust operation usa ka Ramil Pagdalian Cabardo ,30, taga Luray Uno Poblacion ang gisikop human nga midagan ug misuway pag-ikyas. Dihang pagrekisa nakuha gikan ni Cabardo ang usa ka medium size ug duha ka dagko nga putos sa gidudahang shabu.
Gitanggong na sa Toledo City Police Station ang mga dinakpan ug gikatakdang pasakaan og tukmang kaso. Sa laing bahin, nadakpan usab sa buy-bust operation sa Barangay Subabasbas sa dakbayan sa Lapu-Lapu ang usa ka Jimboy Catadman, 20, taga Sitio Mahayahay sa nahisgutang barangay.
Matud ni PO2 Michael Copias sa Basak Police Station 4, nakuhaan og 10 ka paketeng shabu si Catadman human siya girekisa human siya dakpa tungod sa pagbaligya og shabu sa polis. Narekober ‘sab kaniya ang P200 nga marked money. (BANAT NEWS)
- Latest
