Gikan nag-basketball giliog pagpusil
CEBU, Philippines - Giliog sa pagpusil ang usa ka 26-anyos nga lalaki samtang naglakaw sa Sangi New Road, Pajo, dakbayan sa Lapu-Lapu alas 7 sa niaging Huwebes sa gabii.
Matud ni PO2 Joseph Rouel Cutanda, imbestigador sa Lapu-Lapu City Police Office-Homicide Section, nga ang biktima nga si Nelson Inot, residente sa mao’ng dapit gikan nagduwa og basketball ug naglakaw pauli sa ila’ng balay.
Pipila ka gutlo ang nilabay, kalit nitunga ug niduol ni Inot ang wala mailhi’ng tawo ug gipusil siya sa iya’ng liog.
Dali’ng niresponde ang Emergency Rescue Unit Foundation ug gidala sa Mactan Doctors Hospital ang biktima kinsa kritikal ang kondisyon samtang nisibat ang namusil sakay sa nagpaabot nga motorsiklo.
Si Cutanda nagkanayon nga usa ka kabhang sa bala gikan sa usa ka .45 caliber pistol ang nakuha sa crime scene. (Christell Fatima M. Tudtud/GMR)(BANAT NEWS)
- Latest
