Nipatay sa karibal gikasohan na
CEBU, Philippines - Gipasakaan na og kaso’ng murder sa kapolisan sa lungsod sa Consolacion si Michael Yuzon, 24, nga taga Sacsac, Aloguinsan kinsa nipusil patay kang Junrey Suan, 22, nga taga Limasawa, Southern Leyte.
Si Police Officer 2 Retchie Gapo, imbestigador sa Consolacion Police Station, niingon nga ila’ng gidali pagpasaka ang kaso batok kang Yuzon tungod kay nagdali sa pagpauli sa ilang dapit ang tagtungod sa biktima nga modala sa patay’ng lawas niini.
Gihimo na ang hot pursuit operation sa mga dapit nga posible’ng gitagoan sa suspek apan pakyas pa ang kapolisan.
Si Gapo niingon nga gipasalig hinuon sa amahan sa suspek nga itahan ngadto sa kapolisan sa higayun nga mahiuli sa ilang panimalay ang iya’ng anak.
Si Yuzon ug ang namatay pulos hinigugma ni Fritzie Llones nga taga Limasawa, Southern Leyte nga nagtrabaho isip kahera sa usa ka department store sa lungsod sa Consolacion.
Milungtad og usa ka buwan ang relasyon ni Llones ug Yuzon hangtud nagkabuwag ug nagkasabot ang lima na ka tuig niya’ng hinigugma nga iyang silingan sa Limasawa sa pag-apas sa Sugbo aron mangita og trabaho.
Sa pagdunggo sa barko nga gisakyan ni Suan niadto’ng Miyerkules sa hapon gisugat pa ni Llones ug gidala sa iyang boarding house sa Consolacion diin nahitabo ang pagpamusil nga nakaingon sa kamatayun sa biktima. (Romeo T. Limpangog/GMR)(BANAT NEWS)
- Latest
