Gang rape nabisto tungod sa sex video

CEBU, Philippines - Tungod sa sex video nga nikatap sa Facebook, nabisto ang matud pag- gang rape sa usa ka 16-anyos sa tulo ka mga lalaki nga duha niini mga minor de edad ug mga graduating sa high school ning dakbayan sa Sugbo.

Base sa nakuhang impormasyon sa Banat News, mireklamo sa barangay ang inahan sa 16-anyos human mikatap sa Facebook ang sex video sa iyang anak kauban ang tulo ka mga lalaki.

Si Chief Inspector Arthur dela Rosa, hepe sa Punta Princesa Police Station nga nahinabi sa Banat News miingon nga niadtong Miyerkules gihatod sa usa ka barangay tanod sa usa sa mga barangay (pangalan gipugngan sa Banat News) nga sakop sa ilang hurisdiksyon ang usa ka 19 anyos nga lalaki nga gitudlo sa inahan sa biktima nga usa sa mga suspek.

Ang hepe sa Punta Princesa Police miingon nga posibling dugay na nahitabo ang krimen apan tungod sa pagkatap sa sex video sa internet ayha pa kini nareklamo.

Si Dela Rosa mitug-an nga nagpadayon pa ang imbestigasyon sa Women’s and Children Protection Desk kalabot sa maong hitabo ug napaubos na sa medical examination ang biktima samtang ang suspetsado pasakaan na og kasong rape. (Jojo C. Ugdol/EIM)(BANAT NEWS)