Drugas sa Mandaue gikan sa Cebu City

CEBU, Philippines - Gikan sa dakbayan sa Sugbo ang shabu nga gipayuhot sa dakbayan sa Mandaue.

Kini ang gibutyag ni Superintendent Josefino Ligan, hepe sa Criminal Investigation and Intelligence Branch (CIIB) sa Mandaue  City Police Office (MCPO).

Matud ni Ligan nga ilang gihingusgan ang kampanya batok sa ilegal nga drugas sa dakbayan tungod kay mao kini ang ilang kaakuhan nga gimando sa ilang mga opisyal.

Base sa ila’ng pag-monitor, suliran sa 27 ka barangay ang ilegal nga drugas apan ang grabe’ng naapektohan ang barangay Paknaan, Umapad, Opao, Looc, Cambaro, ug Mantuyong.

Si Mayor Jonas Cortes nihatag na sa iya’ng marching order sa kapolisan sa pagtutok sa maong problema.

Subay sa marching order ni Cortes, ang mayor nipasalig nga mohatag og financial support sa kapolisan.

Niadto’ng Lunes gipahigayun ang drug test sa 50 ka polis sa MCPO apan pulos negatibo.

Si MCPO Director, Senior Supt. Petronelli Baldebrin nanawagan sa tabang sa komunidad sa pagsanta sa kriminalidad sa dakbayan lakip na sa pagpanulis sa mga establesemento .

Matud ni Baldebrin nga mga nagpadagan og negosyo kinahanglan usab nga ila’ng hatagan og kasegurohan ang ilang establesemento pinaagi sa pag-hire og private security guard nga mobantay.

Si Baldebrin niingon nga sa gitulis nga E-Bingo sa City Time Square ilang namatikdan nga luag kaayo ang seguridad niini.

Kini gumikan kay wala’y security guard ug ang sibilyan lang ang watchman.

Si Baldebrin nidugang nga ilang ipadayun ang paghatag og kasayuran sa mga telepono sa kapolisan sa MCPO aron kalikayan nga masubli pa ang maong hitabo sa pagtulis sa nahisgutang bingohan. (BANAT NEWS)