Duha nakuhaa’g pekeng P50 mil

CEBU, Philippines - Gipaslak na karon sa karsel sa Pardo Police Station ang mag live-in partner nga nakuhaan og P50 mil nga pekeng salapi  sa Barangay Sudlon 1 dakbayan sa Sugbo.

Ang mga dinakpan naila nga sila si Ritchel Praba, 33, ug Medes Torres, 37 nga pulos taga Sitio Calamba, Guihulngan, Negros Oriental.

Matud pa ni Police Officer 1 Feliciano Yballe sa Pardo Police nga nahinabi sa Banat News ug mao’y nakadakop sa duha   nga usa ka tindera ang miduol kaniya ug nangayo’g pakitabang didto sa Barangay Sinsin kay nakadawat siya og peke nga P1,000.

Sumala pa nadawat kini niya dihang dunay duha ka tawong nipalit og softdrinks nga iyaha usab nasuklian, apan uwahi na siyang nakabantay nga peke diay kini, iya untang giapas ang duha apan nakasakay na sila og taksi paingon sa siyudad. Daling migukod si Yballe  ug naapsan sa Barangay Sudlon 1.

Sa pagrekisa ni Yballe sa mga suspetsado nakuhaan sila og P50,000 nga pulos peke. Sa imbestigasyon nga gihimo sa Pardo Police miangkon silang ilahang napalit ang pekeng kwarta diha sa Colon, Cebu City.

Kasong illegal possession and use of false treasury ang gipasaka batok sa duha. (BANAT NEWS)