Pito ka konsehal miisnab ni Davide

CEBU, Philippines - Nasagmuyo si Gobernador Hilario Davide III sa pito ka konsehal sa lungsod sa Daanbantayan tungod sa wala nila pagtambong sa gikatakdang mediation tali kanila ni Mayor Augusto Corro ug ubang mga opisyal sa lungsod kagahapon sa buntag.

Matud ni Davide nga sa suwat nga gipadangat sa mga konsehal ngadto kaniya nagpasabot nga dili g’yud sila mouyon sa plano ni Corro.

Dugang ni Davide nga posibleng ang probinsiya na lang ang moabaga sa equity sa ihatag nga grant sa World Bank apan susihon una nila ang mga proseso niini. Ang maong mediation kabahin kini sa wala pag-uyon sa pito ka konsehal sa Support for Strategic Local Development and Investment Project of the World Bank aron tabangan ang 16 ka lungsod nga naapektahan sa bagyong Yolanda.

Ang lungsod kinahanglan kining moatbang o mohatag og 10 porsiyento isip equity sa kantidad ihatag sa WB  hinungdan nga nanghangyo si Corro sa konseho nga tugotan siyang makautang ang lungsod sa Land Bank of the Philippines  sa maong kantidad, apan wala sila mosugot.

Si Corro lamang ug sila si Bise Mayor Albert Arabes ug sila si Konsehal Emmanuel Benatero ug Chona De Leon, municipal engineer ug municipal treasurer ang mitambong sa mediation.

Apan sayo pa ang nahisgutang mga konsehal mipadala og suwat ngadto kang Davide ug mipasangil nga gidaot sila sa mayor ngadto sa katawhan sa lungsod ug gihinganlan pa sila og dili maayo diha sa interview niini sa radyo.

Mipasangil usab nga ang maong giplanong proyekto sa mayor wala kini public consultation.

Niadtong nanglabay nga mga adlaw, gatosan ka mga taga Daanbantayan ang nagprotesta atubangan sa munisipyo ug nanawagan sa konseho ang tugotan nga mayor sa hangyo niini.

Ug aron di mabug-atan ang lungsod, gikan sa P885 milyones gipaubsan na lang ngadto sa P227 milyones ang giduso sa lungsod nga proyekto sa WB ug ang ilang equity P20 milyones na lang.

Matud ni Corro nga ang ubang mga proyekto sama sa rehabilitasyon sa merkado, relocation sa munisipyo ug upgrade sa RHU dili na ipadayon tungod kay maabtan sila sa tagal nga gihatag sa WB. (BANAT NEWS)