“All out war” batok illegal parking giduso
CEBU, Philippines – Nanawagan si Bokal Arleigh Jay Sitoy og suporta alang sa “all out war” batok sa mga illegal parking sa mga sakyanan sa mga busy nga highway, huot nga karsada ug sidewalks.
Si Sitoy niawhag sa mga lokal nga kagamhanan sa istrikto’ng pagpatuman sa lagda sa trapiko sulod sa 24 oras matag adlaw ug pagsikop sa mga malapason. Gipasabot ni Sitoy nga ang kahuot sa trapiko mao’y usa sa daku’ng problema sa kalungsuran ug dakbayan sa probinsiya.
Matud niya nga ang pagkawala’y disiplina sa ubang motorista ug paglapas sa lagda sa trapiko lakip na niini ang ilegal nga parking mao’y usa sa nakahatag sa kahuot sa trapiko.
Gikinahanglan sab ang pagpakgang sa batasan sa mga motorista sa pagpataka og parada sa ilang mga sakyanan aron malikayan ang disgrasya sa pedestrian.
Nabantayan nga ang mga tawo anha na mosubay sa agianan sa mga sakyanan tungod kay ang sidewalk dunay mga giparada.
Dugang ni Sitoy nga ang kahuot sa trapiko maoy usa sa mga frustration sa mga Sugbuanon tungod sa pagkawala’y disiplina sa ubang mga motorista. – /GMR) (BANAT NEWS)
- Latest
