Kritiko ni Binay may bahad

CEBU, Philippines – Kanhi Makati bise mayor Rene Mercado ania sa Sugbu aron manalipod sa kaligdong sa Boy Scouts of the Philippines (BSP) luyo sa kontrobersya sa pagdumala ni Bise Presidente Jejomar Binay. Nibahad si Mercado nga ipangkiha niya sa Ombudsman ang mga sakop sa Boy Scout of the Philippines (BSP) National Executive Board kung di mahatag ang interes gikan sa Alpha Land nga maoy nasabotan nga return of investment.

Kini gumikan kay naglibog usab si Mercado kung ngano nisugot ang board of directors sa  lakang ni Binay nga mo-invest og P600 milyones sa Alpha Land.

Si Mercado kauban si Atty. Rene Bondal giimbitar sa BSP Cebu City Council aron paghatag og katin-awan sa maong kaso nga gisang-at ni Mercado batok kang Binay kinsa mao karoy  pangulo sa BSP National Council.

Gihatagan ni Mercado og kopya sa mga dokumento ang BSP Cebu Council pagmatuod nga ang BSP usa ka Government Owned and Controlled Corporation (GOCC) base sa giluwatan nga desisyon sa Korte Suprema.

Gipasabot ni Mercado nga iya kining gibuhat aron pagprotihir sa organisasyon ug sa kwarta gikan sa mga studyante tibuok nasud.

Sa iyang bahin, si Judge Mienrado Paredes kinsa usa usab ka sakop sa BSP Board miingon nga dunay conflict ang National Council ug ang Cebu Local Council tungod kay buot kontrolon sa national council ang local council hinungdan nga naabot sa korte ang maong kasungian.

Ang BSP Cebu Local Council niingon nga wala silay labot sa mga isyu  didto sa National Council apan apektado sila kay naduhig ang pangalan sa organisasyon.

Nanawagan si Mercado ngadto sa mga ginikanan nga suportahan gihapon ang BSP ug di mabugnaw tungod sa maong panghitabo. Apan usa ka sakop sa Board sa BSP Cebu Local Council nga di buot magpaila ang mipadayag   nga way labot ang Cebu sa national level ug susama og gigamit ni Mercado ang  BSP Cebu. – /EIM) (BANAT NEWS)