Kanhi bise mayor napalgang patay

CEBU, Philippines – Patay na nga napalgan ang usa ka kanhi bise mayor sa lungsod sa Asturias nga usa ka manlalaban sa sulod sa usa ka lawak sa pension house sa Barangay 6 sa lungsod sa Tuburan sa miaging hapon.

Si Atty. Alexander Agravante kinsa nahimong bise mayor sa Asturias niadtong 2004 hangtud 2007,  gikatahong mi-check-in sa Dayangs Pension House niadtong Domingo sa gabii apan nahibulong ang mga empleyado nga wala kini mogawas pagkabuntag.

Pasado alas-8 na sa buntag nianang Lunes walay mitubag sa empleyado nga nanangpit apan wa lang nila kini panumbalinga hangtud nga nag-alas dos na sa hapon wa gihapoy nitubag gikan sa sud.

Tungod niini ang pension house staff  pugsanon nang giablihan ang kwarto  ug diha nila nakita si Agravante nga naghigda sa kama ug walay sapot apan wala nay kinabuhi.

Sa pagsusi sa kapolisan wala silay nakita nga senyales sa foul play sanglit walay samad o bun-og ang abogado ug hapsay sa lawak nga giabangan niini.

Sumala pa ni Senior Police Officer 4 Edgardo Dumangon, deputy chief sa Tuburan Police Station nagtuo nga dunay hearing si Agravante nianang adlaw nga Lunes  ug gikapoy hinungdan nga didto siya sa pension house midiretso.

Si Aspo Agravante, traffic manager sa sibyaanang dyRC ug ig-agaw sa namatay nga nahinabi sa Banat News miingon nga ang igsuon sa abogado nga si David mibutyag kaniya nga nianang adlaw’ng Domingo wala na nila ikakuyog sa pagpangaon ang igsuon. – /EIM) (BANAT NEWS)