Piniriso gisuntok ang kaugalingon 45 ka higayon

CEBU, Philippines – Usa ka piniriso didto sa Oregon ang mibun-og sa iyang kaugalingon pinaagi sa pagsukmag sa iyang nawong 45 ka higayon sa tinguha nga makagawas sa bilanggoan apan way swerte kay nakuha sa security camera ang hiwi niyang binuhatan. Si Aleksander Tomaszewski gisukit-sukit sa kapulisan human kini milusad og brutal nga pag-atake sa iyang kaugalingon. Mipasaka siya og reklamong asulto batok sa mga polis nga maoy iyang gipasanginlan nga mihimo kaniya og dautan.

Ang mga opisyal sa maong prisohan mikompirmar nga si Tomaszewksi nakahiagom og pipila ka samad ug bun-og sa iyang nawong. Apan ang wala damha sa suspetsado nga duna diay camera ang iyang selda.  Sa dihang gipahibawo kabahin sa nakuhang CCTV footage sa iyang gihimo, si Tomaszewski mi-angkon nga  gibuhat-buhat lamang niya ang estorya sa tinguha nga makagawas siya sa prisohan. Si Tomaszewski gibalhog sud sa mga rehas gumikan sa kasong sexual abuse. Human makombikto, gisentensiyahan siya nga mabilanggo sud sa 20 ka adlaw uban sa 36 ka bulan nga probation ug multa nga $500.

Apan gumikan niining bag-o niyang binuhatan, madungagan og 20 ka adlaw ang iyang pagpuyo sa prisohan. (Gikan sa www.mirror.co.uk/EIM)