Kapin 100 naisyuhan og tiket sa ceset

CEBU, Philippines – Gatosan ka mga garbage truck drivers ug loaders ang na-isyuhan og citation ticket sa Cebu City Environmental Sanitation Enforcement Team (CESET) human masakpi nga wala mobahig sa basura ug walay trapal ang mga truck.

Matud ni Grace Luardo, pangulo sa CESET, 33 ka trabahante ang na-assign sa City Hall’s Department of Public Services ug 72  nga nadestino mga barangay sa dakbayan ang gitiketan. “Atong gidakop kay wala ga-segregate sa basura and walay trapal ang ilang garbage trucks. Under City Ordinance 2031 dapat dili mangolekta og basura kun wala pa na-segregate ug dapat totally covered ang garbage truck kay ang tendency ana mangahulog ang mga basura kun kusog mopadagan ang driver,” matud niya.

Saysay ni Luardo nga nagsugod sila sa ilang operasyon human makadawat og reklamo nga adunay mga sako sa basura nga nagkatag sa kadalanan nga gituohang nangahagbong sa garbage trucks.  Nagsugod ang maong operasyon niadtong Pebrero 26 ning tuiga. Ang tanang nadakpan pabayron og P500 isip settlement fee, apan pwede rang mag-community service kun walay kwarta nga ikabayad.

Matud ni Luardo nga angay moadto sa iyang opisina kadtong mga na-isyuhan og citation ticket pito ka adlaw human sa insidente aron malikayan ang pag-file og kaso batok sa mga violators.

Giawhag usab niya ang tanang garbage collectors sa City Hall ug barangay nga mosunod sa ordinansa.  – /EIM) (BANAT NEWS)