Atleta sa CVIRAA gimolestiya

CEBU, Philippines – Usa ka maestro sa elementarya ang gireklamo sa usa ka tinun-an sa grade 6 nga misalmot sa Central Visayas Regional Athletics Association (CVIRAA) tungod sa pagmolestiya kaniya niadtong nakalabay nga Huwebes sa gabie sa likod sa tunghaan nga ilang temporaryo nga gipuy-an sa Asturias.

Ang mireklamo nga bata nag-edad og 11- anyos nga taga Dumlog dakbayan sa Talisay, samtang ang gireklamo nga maestro nag- edad og 27-anyos (pangalan gipugngan sa Banat News) ug nagtudlo sa Talisay City Central School.

Sa report ni Futh Anthony Inso sa DYHP RMN Cebu, si Dr. Lea Noveras ang Division School Superintendent sa dakbayan sa Talisay miingon nga nahitabo ang maong insedente sa dihang nagtapok sa gawas sa tunghaan ang mga atleta, coaches ug mga magtutudlo  kay nag-ampo alang sa kalampusan sa ilang team.

Sumala pa nga dili coach sa biktima ang maong maestro apan kauban ra sila og division. Matud pa nga ang bata gitawag sa maong maestro ug gidala sa likod sa tunghaan ug didto giduwaan ang iyang kinatawo.

Petsa 28 na mitug-an ang bata sa iyang coach nga maestra hinungdan nga ilaha kining  gipa-blotter sa kapulisan sa Asturias ug gilayon gipaubos sa medical examination ang bata sa tambalanan.

Gumikan sa hitabo wala na patiwasa sa iyang giapilan nga duwa ang bata ug kini gipapauli na lang kini sa ilaha.

Si Noveras miingon nga ila nang napaabot sa regional office sa DepEd ang insidente. Ang Department of Social Welfare and Development mohimo usab og imbestigasyon sa maong hitabo.

Gikatahong bag-o pa lang nahimong magtutudlo ang maong maestro. Ang Banat News misulay og kontak sa Women’s and Children Protection Desk sa Asturias Police ug sa hepe sa maong buhatan apan way nagpa-interbyu kanila. – /EIM) (BANAT NEWS)