Kapin P300 mil shabu nasakmit
CEBU, Philippines – Gibanabana kapin sa P300 mil nga kantidad sa shabu ang nasakmit sa kapolisan sa managlahing mga operasyon sa siyudad sa Toledo ug Lapu-Lapu nga miresulta sa pagkasikop sa mga suspek.
Sa dakbayan sa Toledo, usa ka gipasanginlang level 3 drug pusher sa Sitio Lawis, Luray Uno ang nadakpan kagahapon sa buntag nga giilang si Raul Malasado, 30.
Usa ka buy-bust operation ang gilusad sa kapolisan pinangulohan ni Inspector Jovito Labra batok ni Malasado.
Ang maong dinakpan nalakip sa target lists sa kapulisan nga tigpayuhot og ilegal nga drugas tungod kay makabaligya kini og dili momenos sa 250 ka gramo nga shabu matag semana.
Napalitan sa poseur buyerog shabu sa suspek maong kini gidakop. Dugang nakuha ang lima ka dagkong putos sa gituohang shabu nga nagkantidad og P75 mil matag usab, ug lain pang mga gagmay nga pakete nga duna gihapoy sud nga shabu.
Samtang sa dakbayan sa Lapu-Lapu City, nadakpan sila si Rolito Ompad 38-anyos, residente sa Sitio Bukid-Bukid, Barangay Pajac ug samtang si Joel Amistad, nga nagpuyo sa Agus Proper sa Barangay Agus. Nakuhaan og 12-ka gagmay’ng putos ug duha ka medium size nga paketeng shabu si Ompad, si Amistad nakuhaan usab og usa ka.45 caliber pistol ug pinaketeng shabu. – /EIM) (BANAT NEWS)
- Latest
