Kada adlaw ‘fire prevention day’— BFP 7 chief

CEBU, Philippines – Sa pagbukas sa Fire Prevention Month ning buwana, ang Regional Director sa Bureau of Fire Protection nga si Senior Superintendent Ma. Luisa Hadjula nanawagan sa publiko nga isipon ang tanang adlaw nga fire prevention day ug dili lang sa buwan sa Marso.

Mao na kini ang katapusang Fire Prevention Month ni Hadjula tungod kay upat nalang ka adlaw moretiro na kini sa pagpanerbisyo.

Matud pa ni Hadjula nga matag buwan sa Marso, mas gihingusgan lang nila ang kampanya pag-edukar sa publiko kun unsaon paglikay sa sunog.

Ang BFP nangapud-apod og mga flyers  sa mga fire safety tips lakip ang mga contact numbers sa kabomberohan nga mahimong tawagan kun dunay sunog.

Base sa talaan sa Bureau of Fire Protection mas nimenus ang kaso sa sunog gikan buwan sa Enero hangtud sa Pebrero ning tuiga diin mitala lang sila og 164 ka sunog sa tibuok rehiyon kun itandi sa miaging tuig sa susamang mga buwan nga miabot og 182.

Sigon pa ni Hadjula 9.82 porsiyento ang pagkunhod niini ug kini gituohan niyang tungod kay dili kaayo init ang panahon nianang mga bulana kun itandi sa mga nanglabay’ng katuigan.

Nasayran usab nga sagad sa mga hinungdan sa mga sunog nga mitumaw sa Enero ug Pebrero mao ang electrical connections.

Gibutyag usab ni Hadjula nga sukad sa paglingkod niya, nadugangan ang mga gamit ug firetrucks sa BFP-7.

Sa dili pa kini mobiya ang opisyal miingon nga ang legasiya nga iyang ikabilin mao ang dedikasyon sa trabaho bisan mabutang sa risgo ang kinabuhi. – /EIM) (BANAT NEWS)