Fire prevention month karon

CEBU, Philippines — Pormal nga buksan karong adlawa ang Fire Prevention Month nga timailhan usab nga opisyal nang nagsugod ang ting-init.

Ang nagkadaiyang buhatan sa Bureau of Fire Protection sa Metro Cebu molusad og mga programa ug kalihokan nga ang gitumong aron pag-edukar sa katawhan  batok sa sunog.

Ang hepe sa Lapu-Lapu City- Bureau of Fire and Protection nga si City Fire Marsh Oscar Mayol midasig sa publiko nga magmatngon ug magpakabana. "Everyday is fire prevention day," matud pa ni Mayol.

Matud pa ni Mayol, masinati na karon ang grabeng kainit sa panahon sa pagsulod sa bulan sa Marso.

Nunot niini, ang BFP sa Lapu-Lapu molusad og mga pagbansaybansay sa matag barangay fire brigades aron sila mahanas sa firefighting ug fire safety nga matudlo nila sa komunidad.

Sa tuig 2013, adunay 40 ka alarma sa sunog ang narespondehan sa BFP nga mikabat og P3.59 milyones ang danyos nga sagad residential units sa siyudad.

Nimenus kini sa tuig 2014 diin 35 ka sunog ang natala ug nagbilin og P1.025 milyon. Ning pagsud sa 2015, duna nay lima ka sunog nga girespondehan ang ilang buhatan.

Samtang sa dakbayan sa Mandaue, gipahibalo ni Senior Fire Officer 3 Roy  Garcia, ang chief investigator sa  BFP Mandaue City nga dunay foot  parade  ug motorkada ang  BFP sa dakbayan , ug fire volunteers. Mopasiugda usab sila og essay writing contest ug drawing contest sa mga tinun-an ug ang Fire Olympics nga pagasalmutan sa mga sakop sa Barangay Volunteer Fire Brigade ug sa organic personnel sa BFP.

Sa laing bahin, ang Cebu City adunay average nga 20 ka insidente sa sunog kada buwan sa Marso sa nakalabay nga tulo ka tuig.

Matud ni Cebu City Fire Marshall Chief Insp. Rogelio Bongabong Jr. nga sa tuig 2013, adunay 31 ka sunog sa siyudad, sa tuig 2013 miubos kini ngadto sa 17 ka sunog, ug sa miaging tuig 2014 misaka kini ngadto sa 27 ka sunog.

Butyag ni Bongabong nga mas hugot nga pagmatngon ang angay buhaton sa publiko nunot ning pagsud na sa ting-init. Gani, sa pagkakaron, aduna nay natala nga 26 ka mga sunog gikan sa Enero hangtud sa buwan sa Pebrero niining      tuiga.

Unang giobserbar ang Fire Prevention Month niadtong Marso 1, 1967 human gipagawas ni kanhi presidente Ferdinand E. Marcos niadtong Nobiyembre 17,1966 ang Presidential Proclamation No. 115-A. (BANAT NEWS)